Nog geen nuwe uitbrekings van bek-en-klouseer is in Limpopo aangemeld nie, en personeel van die direktoraat veeartsenykunde is druk besig om vee by kommunale diptenks binne ’n 10 km-radius rondom die uitbrekings van Maart in te ent om verdere verspreiding te voorkom.
Ndalene het onlangs die media genooi om saam met haar te sien hoe nagenoeg 400 beeste by die Shakadza-kommunale diptenk in die Vhembe-distrik geënt word.
Shakadza lê Noordwes van die Collins Chabane-munisipale distrik, waar die siekte in Maart uitgebreek het. Beeste by hierdie diptenk word voorkomend ingeënt om ’n buffer rondom die uitbrekingsgebied te skep. Voordat hulle ingeënt word, word bloedmonsters geneem om seker te maak die diere was nie wel met bek-en-klouseer besmet nie.
Nadat hulle ingeënt is, kry elke bees ’n F-brandmerk aan die regterkant van die nek, en beeste met hierdie brandmerk sal voortaan op dieselfde wyse as vee uit die bek-en-klouseerbeheersone bestuur word.
Beweging beperk
Omdat beeste wat ingeënt is, positief sal toets vir bek-en-klouseer, sal dit onmoontlik wees om tussen hierdie gebied se beeste en ander besmette beeste uit die bek-en-klouseervrye sone te onderskei. Daarom mag geen beeste uit die beheergebied vervoer word nie, al is hulle veilig vir menslike gebruik en tegnies nie siek nie.
Ndalene het die kommunale boere van Shakadza bedank vir hul samewerking om bek-en-klouseer te bekamp. Sy het ook gewaarsku dat mense wat diere van en na hierdie beperkte gebiede verskuif, vervolg sal word.
Daar word verwag dat me. Thoko Didiza, die minister van landbou, grondhervorming en landelike ontwikkeling, binnekort die siektebeheergebied gaan uitbrei om die gebiede noord van die bestaande beheersone wat in 2019 aangekondig is, in te sluit.
