Die wêreldorganisasie vir dieregesondheid (WOAH), voorheen bekend as die internasionale organisasie vir dieregesondheid (OIE), beskou die Krugerwildtuin as besmette gebied waar die siekte as endemies beskou word. Oos van die wildtuin en suid van die grens met Botswana en Zimbabwe is daar ’n buffersone van 10 km tot 20 km wyd wat ook deur die WOAH erken word as bestuursone vir die siekte.
Limpopo se direktoraat veeartsenykynde bestuur hierdie strook in twee sones met die sogenoemde rooilyn, ’n geëlektrifiseerde heining van 2,4 m hoog wat die hele beheersone lengtegewys in twee deel. Mnr. Gerhard Coetzer, adjunkdirekteur van dieregesondheid by Limpopo se departement van landbou en landelike ontwikkeling, sê hierdie 350 km lange heining het dringend aandag nodig en dit is tans hoog op die provinsiale direktoraat se prioriteitslys.
Die heinings van die westelike grens van die Krugerwildtuin en die grens met Botswana en Zimbabwe moet ook dringend herstel word.
