Hy is op ’n glansgeleentheid in Stellenbosch aangewys as vanjaar se wenner van die Wes-Kaapse Plaaswerker van die Jaar-kompetisie. Dié kompetise gaan elke jaar van krag tot krag en vanjaar was geen uitsondering nie. ’n Rekordgetal van 1 057 plaaswerkers het vanjaar ingeskryf.
Thomas is die afgelope 14 jaar werksaam op die landgoed waar hy as ’n seisoenwerker begin het. Tans beklee hy ’n junior bestuursposisie en is verantwoordelik vir die toesighouding van die werkers. “Ek het dit nie verwag nie, maar dit is ’n droom wat verwesenlik is,” het ’n oorstelpte Thomas gesê. Hy het weggestap met pryse ter waarde van R100 000 wat onder meer kontant, ’n studiebeurs en ’n oorseese studiereis insluit.
Die prys is deur mnr. Alan Winde, die WesKaapse minister van ekonomiese geleenthede, oorhandig. Volgens mnr. Winde is die WesKaapse landbousektor verantwoordelik vir ’n ekonomiese inspuiting van sowat R14,7 miljard in die provinsie en word ongeveer 129 000 werksgeleenthede deur dié sektor geskep. “Ek glo in die kompetisie. Dit gee die nodige erkenning aan werkers in ’n baie belangrike sektor van ons land,” sê Winde.
Mnr. Franklin Jansen van die plaas Jamacajo, Hexvallei, is aangewys as die plaaswerker met die meeste potensiaal. Die provinsiale katagoriewenners is ook tydens die geleentheid aangewys. Hulle is: Mnr. Hendrik Rooi van die Witzenbergstreek (algemene werker), mnr. Bonito Pedro van Grabouw (trekkerdrywer), mnr. Wayne van Rooyen van Stellenbosch (administratiewe personeel), mnr. Booi Blom van Koup (diereproduksie), mnr. Gladwin Nzima van Stellenbosch (tegniese operateur), mnr. Dawid Davids van die Hexvallei (besproeiingspesialis), me. Rose van Wyngaard van Franschhoek (sosiale ontwikkeling), mnr. Japie Petoors van die Hexvallei (junior bestuur), mnr. Faiz Neethling van die Langebergstreek (middelbestuu
