Hy sê Agri SA het mnr. André de Ruyter, uitvoerende hoof van Eskom, skriftelik versoek vir meer duidelikheid oor die vooruitsig vir beurtkrag in die komende weke. “Aangesien beurtkrag aan die begin van die somerplantseisoen vererger, kan die huidige kragkrisis ’n impak op voedselsekerheid in die komende jare hê as boere nie die nodige maatreëls vinnig genoeg kan toepas nie.”
Krag is ’n noodsaaklike landbou-inset. Volgens die departement van landbou, grondhervorming en landelike ontwikkeling het die landbousektor verlede jaar sowat R9 miljard op krag bestee. “Dit is 7% meer as die sektor se besteding op intermediêre goedere en dienste. ’n Betroubare kragvoorraad is veral noodsaaklik vir die sektor se besproeiing en waterbehandeling,” sê Van der Rheede.
Volgens hom het beurtkrag verreikende gevolge vir verskeie landboukommoditeite en dat die impak van beurtkrag veel verder as net kragonderbrekings strek. “Dit duur gewoonlik tot ’n uur vir besproeiingstelsels om te hervat nadat beurtkrag geëindig het. Dit kos boere tyd en addisionele arbeidskoste. Kragonderbrekings onderbreek ook verkoeling en verpakking wat op sy beurt weer ’n impak op voedselgehalte het. Dit kan tot gesondheidsrisiko’s vir mense en diere lei omdat toegang tot skoon water en die behandeling van afvalwater onderbreek word.”
Wat uitvoerkommoditeite betref, kan beurtkrag lei tot die onderbreking van kouekettingprotokolle wat deur uitvoermarkte vereis word, asook die vertraging van verskepings. “Dit skaad Suid-Afrika se beeld as ’n betroubare mark.”
Grootste bedreiging voedselsekerheid
Die grootste bedreiging wat beurtkrag egter volgens hom inhou, is vir Suid-Afrika se voedselsekerheid. “Indien daar weens onvoldoende besproeiing nie voldoende opbrengste is nie of boere minder plant uit vrees vir verliese, sal die land die gevolge van beurtkrag in die toekoms ook ervaar as die opbrengs vir somergewasse nie realiseer nie. Die gevolg sal dan voedseltekorte en hoë pryse wees.”
Hy sê Agri SA is bewus van Eskom se plan om 1 000 MW krag aan te koop, maar boere moet meer weet sodat hulle vir die komende seisoen kan beplan. “Gegewe die omvang van wat hier op die spel is, het Agri SA vir Eskom genader om meer duidelikheid oor die huidige probleme en insig oor die vooruitsig vir die komende jaar te kry sodat die sektor planne kan beraam om risiko’s te versag en homself asook verbruikers te verskans.
“Ons vertrou dat Eskom en die regering saam met ons sal werk om ’n voedselsekerheidskrisis weens die voortslepende kragkrisis te vermy.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
