Hoewel swak dienslewering deur die polisie daartoe lei dat die aanmelding van sekere misdade tekort skiet, moet boere juis voorvalle aanmeld om te verseker dat hulpbronne toegeken word vir die bestryding van dié misdade.
Mnr. Boeta du Toit, hoofbestuurder van Agri Noordwes en ondervoorsitter van Agri SA se beleidskomitee oor veiligheid, sê hy sal graag wil sien dat die landelike beveiligingsplan suksesvol toegepas word. “Ek sal graag wil sien dat die landelike beveiligingsplan, wat ’n uitstekende plan is, tot sy reg kom en dat vennootskappe met die polisie gevestig word.”
Dienslewering
Swak dienslewering deur die polisie het op baie plekke in die land daartoe gelei dat misdade soos veediefstal nie aangemeld word nie. Du Toit sê die nie-rapportering van misdaad werk uiteindelik in misdadigers se guns. “As boere nie misdade rapporteer nie, reflekteer dié misdade nie in statistieke nie. Gevolglik kan hulpbronne dus nie behoorlik toegeken word nie.”
Volgens Du Toit is meganismes beskikbaar om swak dienslewering deur die polisie aan te spreek. “Die prioriteitskomiteestelsel bied ’n geleentheid en raamwerk waarbinne probleme gerapporteer kan word. Probleme kan ook na provinsiale en nasionale vlak ge-eskaleer word.”
“Ek het 'n geval gehad waar ’n plaaswerker ’n boer met ’n mes probeer steek het. Die boer het weggespring en sy hemp is deur die plaaswerker oopgesny. Die polisie wou nie die saak hanteer nie maar ons het dit tot op nasionale vlak ge-eskaleer. Die polisie was verplig om die man te vervolg en hy is uiteindelik skuldig bevind en ’n vonnis opgelê. Na afloop van dié vervolging weet die boer se plaaswerkers dat hulle nie so durf optree nie.”
Du Toit sê volgens die betrokke boer het hy geen meer probleme met dienslewering van die polisie nie.
• In die komende weke gaan Landbouweekblad en Landbou.com die onderwerp van plaasveiligheid op ’n praktiese vlak help aanspreek. Ons verwelkom deelname en kommentaar van lesers en nooi dus lesers uit om met ons in gesprek te tree oor veiligheid op plase. Deel jou kennis en ervaring oor beveiliging of vertel van jou ervaring. Stuur epos aan cornelia.vdmerwe@24.com of kontak ons deur Twitter of Facebook.
