Sekere ingrypings, soos die optimale gebruik van grond in kommersiële landbougebiede, veral deur bewaringsboerdery, die herverdeling van grond en meer steun aan die kleiner sektor van groot kommersiële plase, kan werkloosheid in landelike gebiede omswaai.
Só sê die Departement van Landbou, Bosbou en Visserye se jaarverslag vir 2013/’14 wat in die Parlement ter tafel gelê is.
Met die mededingendheid van die landbou, wat deur die hoë en stygende koste van produksiemiddele ondergrawe word, kom dit al hoe meer na vore dat ’n skuif van konvensionele na bewaringsboerdery gemaak moet word. Met bewaringsboerdery kan dieselfde of selfs beter produktiwiteit teen ’n laer koste van produksiemiddele verkry word.
Die gevolg sal wees dat produsente mededingender sal wees, terwyl die landbou se negatiewe bydrae tot die handelsbalans omgekeer word.
Verder moet ’n beter balans tussen groot kommersiële plase en kleinboerderye deur grondhervorming en ontwikkeling in die voormalige tuislande bevorder word.
Volgens die verslag is die uitdaging om die sektor vir kleinboerete laat groei nou verbind aan die uitdaging om dié soorte boerderye winsgewender te maak. Tans leef meer as die helfte van die huishoudings van kleinboere onder die broodlyn en daarom moet die Regering beter ondersteuningsdienste lewer.
In 2010 is slegs 8% kleinboere deur voorligtingsbeamptes besoek en teen 2012 slegs 13%. Luidens die verslag is daar ruimte om die grootte van die sektor vir kleinboere in dié gebiede te verhoog.
