’n Boerdery in die vrugbare Magoebaskloof in Limpopo word lamgelê deur ’n bakleiery onder begunstigdes.
Die departement van landbou in Limpopo het nou grond van die Makgoba-gemeenskap in dié restitusie-eis teruggevat totdat probleme tussen die gemeenskapstrust en die koninklike gesin opgelos is, sê mnr. Kenny Mathivha, woordvoerder van die departement.
Plase 'verwoes'
“Die stap was noodsaaklik omdat die plase verwoes is. As ’n verantwoordelike regering kan ons nie stilsit en toelaat dat die agteruitgang vererger nie. Benewens die teelandgoed is produktiewe sitrusplase daarmee heen,” het hy gesê.
Die gemeenskap is woedend en sê die verval is die Regering se skuld omdat beloofde toelaes van R26 miljoen nie aan hulle uitbetaal is nie. Maar Mathivha sê die Regering kon nie nóg geld in ’n projek pomp waar daar reeds groot bedrae na bewering verduister is nie.
Sapekoe-teelandgoed
’n Forensiese verslag daaroor word binnekort verwag, sê hy. Intussen is die departement besig om die eens glorieryke Sapekoe-teelandgoed in die gebied weer op te bou.
Sowat 1 500 lede van die gemeenskap is in diens geneem in die eerste fase daarvan. Die eerste oes word in die volgende seisoen verwag. Volgens Mathivha is ’n soortgelyke projek by die Tshivahsa-teelandgoed in die verre noorde van die provinsie in só ’n mate herstel dat dit in die volgende boekjaar aan die gemeenskap teruggegee kan word.
7 Desember 2011
