Die landboumaatskappy BKB het vanoggend (10 Maart) sy buiging op die Kaapstadse aandelebeurs (CTSE) gemaak.
Mnr. Johan Stumpf, besturende direkteur van BKB, het tydens die geleentheid in die Kaapse voorstad Woodstock gesê die maatskappy het sowat 4 600 aandeelhouers wat al die afgelope 20 jaar aandele oor die toonbank verhandel.
“Die rede waarom ons noteer, is om ’n beter platform vir hulle te skep om aandele te verhandel. Sedert wetgewing verander het, het dit moeilik geraak vir kopers en verkopers om mekaar oor die toonbank te vind. Die CTSE het vir ons ’n goeie geleentheid gebied om vir ons aandeelhouers ’n platform te skep waar hulle die prys (van aandele) kan vasstel.”
Volgens hom bied die CTSE, wat hoofsaaklik vir klein- en mediumgrootte ondernemings geskep is, “gebalanseerde” reëls, wat minder streng is as die Johannesburgse aandelebeurs. “Dis goed vir ons om in ’n gereguleerde omgewing te wees, want jy is ewe skielik in die openbare oog.”
Hoewel Stumpf nie verwag dat daar ’n vinnige verskuiwing in aandeelhouding gaan wees nie, glo hy die digitale verhandelingsplatform en beter prysvasstelling gaan likiditeit skep, wat weer op langer termyn waarde vir aandeelhouers kan bring.
“Dis nie op dié stadium ’n groot doelwit om institusionele beleggers te trek nie, maar ek dink jy sal wel vind dat hulle op langer termyn in ons gaan belang stel.”
Groei teen 7,4% per jaar
BKB, wat 103 jaar oud is, het die afgelope 15 jaar sy besigheid uitgebrei om nie net in die vee- en wolbedryf betrokke te wees nie. Hy is ook by die voedselbedryf betrokke met onder meer suiker- en suikerboonhandelsmerke, en ’n rosyntjie-uitvoerbesigheid. Buiten die wolmakelaarsdienste, verhandel hy ook self wol.
Volgens mnr. Jannie van Niekerk, BKB se finansiële direkteur, het die waarde van die besigheid sedert 2017 tot die afgelope boekjaar van R9,9 miljard tot R13,2 miljard gegroei. Dis ’n saamgestelde jaarlikse groeikoers van 7,4%.
Stumpf sê hulle verwag om vorentoe organies te groei, maar meen ook daar is geleenthede om van hul besighede uit te bou.
“Ons sal ’n gediversifiseerde onderneming bly, sodat ons nie net blootgestel is aan een sektor nie. Ons sien uit daarna om waarde te skep vir ons aandeelhouers en een van die toplandboubesighede in die land te bly.”
Belangrikheid van beurs
Volgens mnr. Eugene Booysen, uitvoerende hoof van die CTSE, moet maatskappye wat op dié beurs noteer, aan meer as net die maatskappyewet voldoen.
“Die maklikste manier om te besluit oor wie op die beurs kan noteer, is om te gaan kyk na die maatskappy se impak op die gemeenskap waar dit sake doen. BKB is meer as ’n eeu oud, dis ingebed in sy gemeenskap, het meer as 1 500 werknemers in diens en sowat 62 000 kliënte. As dit nie ’n maatskappy is met ‘n teenwoordigheid en visie nie, dan weet ek nie wat is nie.”
Volgens hom het aandelebeurse ’n belangrike rol om te speel in Suid-Afrika.
“As ons ernstig is oor kapitaaltransformasie en om die Suid-Afrikaanse ekonomie te laat groei, moet ons kapitaal sit in die hande van maatskappye wat ’n verskil kan maak. Ons soek na groeigedrewe maatskappye wat in hul personeel en in innovasie belê. BKB het innovasie en doeltreffendheid as die belangrikste komponente van sy visie vir die toekoms gestel.”
