Die verbruik van hoender- en skaapvleis gaan oor die komende 10 jaar aansienlik toeneem, meen dr. Ferdie Meyer, direkteur van die Buro vir Voedsel- en Landboubeleid (BFAP).
Meyer het Woensdagaand (15 September) afgevaardigdes by die Rooivleisprodusente-organisasie (RPO) se nasionale jaarkongres in Magaliesburg toegespreek.
Volgens Meyer gaan die verbruik van hoender internasionaal vir die volgende dekade jaarliks toeneem met 2,5%. “Die verbruik van hoender gaan dus met 25% toeneem, en ons verwag dat die verbruik van beesvleis met 14,5% gaan styg terwyl varkvleisverbruik met 23,3% gaan toeneem.”
Die Suid-Afrikaanse mark
Wat plaaslike verbruik aanbetref voorspel Meyer ook ‘n toename in hoenderverbruik, met skaapvleis as die tweede gewildste vleissoort. Volgens Meyer gaan die verbruik van hoender in Suid-Afrika tot 2020 met 42% toeneem, terwyl die verbruik van skaap- en varkvleis onderskeidelik met 31% en 14% gaan toeneem. Sowat 17% meer beesvleis sal gebruik word.
“Dié voorspellings is gebaseer op stabiele ekonomiese groei van sowat 4% per jaar,” verduidelik hy.
Meyer sê die verbruik van skaapvleis het die afgelope paar jaar toegeneem. Volgens die statistiek voorspel Meyer die verbruik van skaapvleis kan ná 2014 tot 45kg per persoon per jaar toeneem.
“Dit is wel duidelik dat die verbruik van skaapvleis toegeneem het weens die groot aantal goedkoop invoere wat die land binnekom. Hopelik kan dié neiging verander. Dit is ook opmerklik dat die verbruik van skaapvleis sensitief is tot verbruikers se toegang tot inkomste,” verduidelik Meyer.
Kommer oor statistiek
“Kommer bestaan wel oor die gebrek aan behoorlike statistiek rakende vleisverbruik in die land. Daar is ‘n ernstige leemte wat aangespreek moet word,” sê Meyer.
Volgens Meyer verskil BFAP se statistiek oor verbruik aansienlik van dié van die Departement van Landbou, Bosbou en Visserye. BFAP se statistiek dui aan dat vleisverbruik in 2009 op sowat 680 000 ton te staan gekom het, terwyl die departement se statistiek aandui dit is net meer as 800 000 ton.
Meyer sê hulle kyk na die moontlikheid van ‘n kwartaallikse verslag oor vleisverbruik in Suid-Afrika, terwyl die Regering ook ander moontlikhede in dié verband oorweeg.
16 September 2010
