‘n Boer van Clarens in die Oos-Vrystaat, wie se huis sowat 500m van die Lesotho-grens is, is die afgelope naweek deur vier mans aangeval.
Mnr. Dirk Viljoen, die voorsitter van die Bethlehem distriksboerevereniging, sê die 65 jarige mnr. Eddie Cressy van die plaas Beginsel, is op Erfenisdag in sy huis oorval.
“Die groep het hom Vrydagmiddag so 16:30 in sy huis oorval en hom erg aangerand. In ‘n stadium het hulle hom glo gedreig deur ‘n vuurwapen in sy mond te druk. Hulle het geld geëis, maar hy hou nie kontant in sy huis aan nie. Hulle het hom toe erg toegetakel,” sê Viljoen.
Hande en voete vasgebind
Viljoen sê die aanvallers het Cressy se hande en voete vasgebind voordat hulle hom in die huis toegesluit en met ‘n voertuig oor die grens van die toneel gevlug het. ‘n Vrou wat ook op die werf woon, het later op Cressy afgekom.
“Van die aanvallers is glo aan hom bekend, en ons hoop hulle word vinnig aangekeer “, vertel Viljoen.
Luidens ‘n berig op News24.com ondersoek die Polisie ‘n klag van huisroof. Volgens sers. Majang Mosupa is slegs ‘n kamera gesteel.
Vierde aanval
Viljoen sê hulle is baie bekommerd oor die aanvalle wat die afgelope tyd weer gereeld op plase in die Oos-Vrystaat voorkom.
“Dié boer was die vierde in die omgewing in ‘n paar maande. Onlangs was daar twee aanvalle op plase in die Fouriesburg distrik en nog een in die Clarens omgewing. Iets moet gedoen word, want die meeste daarvan vind naby aan die grens plaas waarna die aanvallers net weer oor die grens vlug.”
Bron: News24.com
27 September 2010
