‘n Boer van Richmond wat drie jaar gelede glo ernstig deur twee plaaswerkers in sy huis aangerand is, dagvaar die staat vir byna ‘n halfmiljoen rand. Luidens ‘n berig op Nuus24.com is mnr. Piet Schrooder ná dié voorval glo strafregtelik aangekla.
Die 67 jarige Schrooder van die plaas Wolwekraal het ‘n eis van R150 000 weens onregmatige inhegtenisname en aanhouding, en sowat R320 000 vir kwaadwillige vervolging ingestel.
Schrooder eis dat hy op 30 Oktober 2007 na bewering sonder ‘n lasbrief inhegtenis geneem is.
Die voorval
Schrooder is op 13 Oktober 2007 deur die twee plaaswerkers, wat hy vroeër die dag met waarskuwingskote van sy werf verjaag het, aangeval. Hy het die mans vroeg die aand op die grasperk gewaar en die waarskuwingskote geskiet. Die aand het hy ‘n slaappil gedrink en met sy rewolwer op die bedkassie geslaap. Hy het wakker geword toe die twee mans voor sy bed gestaan het.
Vyf skote is met Schrooder se vuurwapen geskiet, waarna die twee hom aangerand het. Verskeie items is gebreek en kontant en sy voertuig is gesteel. Die verdagtes is in hegtenis geneem, maar die klagte teen hulle is later teruggetrek, waarna Schrooder op ‘n klag van poging tot moord aangekla is. Hy is op 12 Desember 2008 op die aanklag onskuldig bevind.
1 Desember 2010
