Hy het in die Ermelo-landdroshof vir die borgaansoek verskyn en die saak is tot 29 Augustus uitgestel vir verdere ondersoek. Mnr. Lion du Plessis, voorsitter van die Ermelo-Oos-boerevereniging en die voorsitter van landelike veiligheid vir Ermelo, sê hulle het die situasie buite die hof dopgehou. Hoewel daar in ’n stadium sowat 20 mense saamgedrom het, was daar geen spanning of uitbarstings nie.
Du Plessis, wat ook visepresident van Mpumalanga Landbou is, sê hulle is dankbaar Grobler het borgtog gekry, al het dit onnodig lank geduur. “Ons is verlig daaroor en glo die reg sal nou sy gang gaan en geregtigheid sal geskied.” Lede van die boerevereniging het Grobler na sy plaas begelei nadat hy vrygelaat is.
Mnr. Robert Davel, uitvoerende hoof van Mpumalanga Landbou, het ook sy dankbaarheid uitgespreek oor die borgtog en gesê Grobler was onnodig lank in aanhouding ná die voorval. “Gegrond op ’n private ondersoeker se verslag glo ek in Louis se onskuld en ek hoop die polisie se ondersoek sal deeglik wees sonder dat emosies ’n rol speel.
“Ek wonder dikwels of ons boere altyd billik behandel word en of politiek en rassisme nie te maklik bygesleep word nie. Ek is oortuig daarvan dat hier geen rassistiese ondertone was nie, veral as ek hoor van die goeie verhouding wat hy met sy werknemers het.”
Die voorwaardes vir Grobler se borgtog sluit onder meer in dat hy nie kontak maak met enige getuies in die saak of die slagoffers se huise besoek nie.
Hy word aangekla van twee klagte van poging tot moord en een klag van aanranding met die doel om ernstig te beseer nadat hy na bewering op 15 Julie twee kinders op sy plaas raakgery en ’n derde een aangerand het. Die saak is tot 29 Augustus uitgestel.
