'n Boer van die distrik Howick in die KwaZulu-Natals Middelland is Vrydag dood kort ná 'n beweerde onderonsie met óf 'n werknemer óf 'n ander boer. Die oorledene se naam is nog nie bekend gemaak nie.
Min besonderhede oor die voorval is bekend, maar luidens 'n verklaring deur Midlands EMS in Howick is paramedici omstreeks 10:00 na die Petrusstroom-pad naby Howick gestuur.
“Met hul aankoms is gevind dat een persoon lewensbedreigende beserings opgedoen het. Ten spyte van alle pogings is die pasiënt op die toneel dood verklaar. Daar word beweer dat die boer en 'n werknemer 'n rusie in die huis gehad het, wat tot 'n bakleiery gelei het,” lui die verklaring.
’n Anonieme bron wat na aan die ondersoek is, het aan Landbouweekblad gesê dat die ondersoek na die omstandighede van die slagoffer se dood nog in ’n vroeë stadium is. Die presiese aard van die beserings en omstandighede wat tot sy dood gelei het, word nog vasgestel.
Freddie van Tonder, veiligheidshoof van die KwaZulu-Natalse Landbou-unie (KwaNalu), sê onbevestigde inligting wat hy ontvang het, is dat die beweerde onderonsie tussen twee boere was.
Van Tonder wag vir verdere duidelikheid van die polisie se ondersoekbeampte.
*Hierdie is 'n ontwikkelende storie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
