Drie mans is aangekeer ná hulle na bewering ’n boer op sy plaas naby Dullstroom oorval en beroof het, aldus die SA Polisiediens.
Luidens ’n berig op Nuus24.com sê lt. Leonard Hlathi, ’n woordvoerder vir die polisie, vyf mans met klapmusse aan het die boer se plaas Donderdagoggend (25 Augustus 2011) betree.
Hulle het die boer gedwing om sy kluis oop te sluit en het met ’n onbekende hoeveelheid kontant, juweliersware en selfone op die vlug geslaan.
Ongeluk
Die verdagtes het glo in twee voertuie op die vlug geslaan. Die polisie het die groep agterna gesit. Een van die voertuige was naby Belfast in ’n ongeluk met ’n vragmotor betrokke en die polisie kon hulle in hegtenis neem. Die tweede voertuig het weggekom. Dié twee verdagtes word steeds gesoek.
Die drie aangekeerde verdagtes is in ’n plaaslike hospitaal behandel, maar is ná ’n paar uur ontslaan. Hulle sal na verwagting binnekort in die hof verskyn.
Bron: Nuus24.com
26 Augustus 2011
