Die harde realiteit van 'n hoë werkloosheidsyfer het me. Marieta Groenewald van die distrik Clocolan in 2015 laat besluit om 'n gemeenskapsentrum en skool vir kinders buite die dorp te stig.
"Daar is eenvoudig nie genoeg werk in Clocolan nie," sê Groenewald, wat saam met haar man, Jan, op die plaas Goeweneurskop met mielies, sonneblom, soja en vee boer.
"Die grootste behoefte hier is om kos aan kinders te verskaf wat nie toegang tot die Regering se maatskaplike toelaes het nie," sê sy.
Baie van die kinders wat woon in dorpe op die Vrystaatse grens met Lesotho, en meeste van die kinders in die Lethoteng-gemeenskapsentrum, is Lesotho-burgers en kom nie in aanmerking vir maatskaplike toelaes nie. Die gebrek aan werk in die omgewing beteken dat dié kinders telkens nie skool bywoon nie en ook aan wanvoeding lei. Talle het ook geen amptelike dokumentasie nie, wat dit bykans onmoontlik maak om enige staatshulp te bekom.
Die skool is 'n ware gemeenskapsprojek, met mense uit die omgewing wat as vrywilligers die kinders onderrig en vaardighede soos naaldwerk, houtwerk, musiek, sowel as vakke soos Engels en wiskunde leer. Boere uit die omgewing skenk groente en vleis om die gemeenskapsentrum te help om ten minste een ete 'n dag aan die 110 kinders te verskaf wat hier skoolgaan.
Moeilike omstandighede
Me. Agnes Motoi van die Hlohloloane-kindertehuis op Clocolan verskaf ook berading aan die kinders, terwyl hulle ook arbeidsterapie ontvang waar nodig.
"Ons doen dit omdat soveel van hierdie kinders uit moeilike omstandighede en agtergronde kom," sê Motoi. Die grond waarop die skool gebou is behoort aan die Setsoto-munisipaliteit, wat dit verniet verhuur vir die sentrum se bedrywighede.
'n Groentetuin is gevestig om kosskenkings aan te vul. Groenewald is passievol oor die skool en die werk waarmee hulle besig is.
"As ons 'n verskil kan maak een een kind se lewe en daardie kind kan 'n verskil maak aan die volgende een se lewe, sal ons uiteindelik 'n momentum opbou van mense wat goed is vir mekaar. So kan ons 'n impak maak," sê Groenewald.
