Die polisie in Noordwes het ’n verklaring uitgestuur om die gemeenskappe van Stella en Tlakgameng te waarsku nadat ’n leeuwyfie ontsnap het uit ’n krat agterop haar eienaar se bakkie. Die bakkie het op die Beesdampad tussen Stella en Tlakgameng gery.
Mnr. Naudé Pienaar, assistent-bestuurder van Agri Noordwes, het aan Landbou.com gesê mense moet op die uitkyk te wees vir dié leeu of moontlike spore op plase en/of in veekampe en om dit aan te meld by hul veiligheidsgroepe of die polisie. “Niemand het nog iets aangemeld nie en sover ons weet, het die leeu nog nie enige vee gevang of beseer nie.”
Mnr. Edwin Voges het die naamlose leeu vanaf ’n leeuplaas by Mosita naby Stella vervoer na ’n wildreservaat by Tlakgameng, sowat 50 km wes van Stella.
“Ons het gisteroggend om 09:00 besef sy is weg toe ons by die bestemming aankom. Ek is die permithouer van die leeu en het ook ’n permit gehad om haar wetlik te vervoer.
“Die krat waarin ek haar vervoer het, voldoen aan al die vereistes. Die pad waarop ons gery het, is egter in ’n baie swak toestand, wat net vererger is deur al die reën wat onlangs geval het. Ons vermoed die geskud het veroorsaak dat iets losgekom het.”
Hy sê hulle het onmiddellik die polisie en natuurbewaring in kennis gestel en ’n helikopter gekry om die roete waarop hulle gery het vanuit die lug te fynkam, maar kon haar nie kry nie.
“Ek vermoed sy het iewers onder ’n boom gaan lê soos wat leeus in die dag doen. Daar is geen rede om paniekerig te raak nie. Ons is onverpoos besig om die area te fynkam met die samewerking van die polisie en natuurbewaring. Ek het twee vliegtuie op bystand en ook twee veeartse.
“Daar is beslis geen planne om die leeu van kant te maak nie. Ons gaan haar verdoof sodra ons haar vind en dan vervoer na die wildreservaat waarheen sy moet gaan,” sê Voges.
Die leeukenner mnr. Kevin Richardson sê dis moeilik om te sê hoe ver die leeu in die tyd kon beweeg het. “Sy kon enige afstand van 1 km tot 60 km afgelê het. Maar mense moet in ag neem dat sy baie bang en onseker sal wees en dan is ’n leeu geneig om nie te ver af te dwaal nie. Dikwels volg hulle ook hul instink en beweeg terug na die gebied waar hulle vandaan kom,” sê Richardson.
Enigiemand wat die leeu gewaar, kan mnr. Nanti Strydom bel by 082 563 7763 of mnr. Siyabonga Mseleku by 073 446 7452 of 081 336 6882.
*Mnr. Henk van Wyk, inwoner van Stella, het vroeg Vrydagoggend 'n stemboodskap aan die media uitgestuur dat die leeu gevind is en dat die owerhede ook daarvan in kennis gestel is.
Luidens inligting wat die Noordwes departement van ekonomiese ontwikkeling, omgewingsake en toerisme op sy Facebookblad gedeel het is die leeu deur 'n boer gevind in die distrik Piet Plessis. Die boer het onmiddellik die eienaar gekontak en hom laat weet die leeu is gevind. Die leeu is wel gevind in 'n residensiële area en die boer het die besluit geneem om die leeu dood te skiet. Die departement sê hy is dankbaar dat niemand van die gemeenskap deur die leeu aangeval is nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
