Boere wat saad aan ander boere verkoop, oortree die wet en kan vervolg word. “Hulle soek vir ’n pak slae,” het mnr. Willem Engelbrecht, voorsitter van die SA Vereniging vir Gewasproduksie, ondervoorsitter van Sansor en bestuurder vir agronomiese gewasse van Klein Karoo Saad, op ’n vergadering van die Sojaboonwerkgroep in Johannesburg gesê.
Hy het gereageer op 'n stelling deur mnr. Gerhard Scholtemeijer, voorsitter van die Proteïennavorsingstigting (PNS), dat saadmaatskappye nie genoeg saad produseer nie. “Skynbaar glo hulle nie ons vooruitskattings dat die verbouing van sojabone toeneem nie,” het hy bygevoeg.
Engelbrecht het gesê sommige saadmaatskappye moet soms saad as graan verkoop as boere nie alles koop nie. Dit het in die verlede gebeur toe boere eerder meer mielies geplant het omdat die mielieprys hoog was. Vanjaar is die mielieprys laag en wil meer boere sojabone plant.
Sommige boere hou ook ’n deel van hul oes terug om weer te plant en koop dan nie saad by maatskappye nie. Party boere verkoop selfs dié “saad” onwettig aan ander boere. Agri Inspect stel ondersoek in en oortreders sal aangekla word.
Groot geesdrif oor sojabone heers onder boere. Mnr. Johan du Plessis van KwaZulu-Natal het gesê in hul provinsie kan aanplantings met 5-12% toeneem. Bykans al die beskikbare saad is reeds verkoop. Scholtemeijer het gesê Mpumalanga en Noordwes se boere gaan ook meer plant weens die lae mielieprys en voordeel van wisselbou. Mnr. Jannie Botma van Bothaville het gesê dit lyk of die Vrystaatse boere 18% meer sojabone gaan verbou.
In 2007 het sojabone 7% van boere se aanplantings uitgemaak teenoor mielies. Nou is die verhouding 16% sojabone en 84% mielies. Scholtemeijer het gesê hulle mik vir 30% sojabone en 70% mielies.
