Klagte dat hartwaterentstof nie doeltreffend is nie, is gegrond. Slegs toetse kan in spesifieke gebiede bepaal wat die presiese oorsaak is, sê dr. Helena Steyn, navorser by Onderstepoort-instituut vir Veeartsenykunde (OVI).
Sy sê sy is bewus van probleme wat landwyd voorkom, maar die OVI sukkel om inligting daaroor te kry omdat boere dit nie aanmeld nie. Volgens mnr. Mike Combrink, navorsingstegnikus by die OVI, beskerm die bestaande entstof nie ewe doeltreffend teen alle hartwater-isolate nie.
“Heelwat meer isolate as vroeër is bekend. Die Welgevonden-isolaat wat byvoorbeeld veral in die Bosveld voorkom, is baie kragtig. Omdat die bestaande Ball3-entstof nie doeltreffend daarteen is nie, word boere aangeraai om as alternatief hul diere aan ’n groot lading bosluise bloot te stel en vir drie keer agtereenvolgens elke 14 dae met antibiotika te behandel omdat immuniteit nog nie verseker is nie.”
Nuwe entstof
Die nuwe entstof wat uit die Welgevonden-isolaat ontwikkel word, sal beter beskerming teen ’n verskeidenheid isolate bied. Dit gaan egter nog lank duur voor dit beskikbaar is, sê hy.
Steyn sê veldtoetse met die nuwe entstof gaan binnekort op skape en Angorabokke begin, maar dit gaan nog lank duur voordat dit op beeste gedoen word.
Sy sê boere wat wil weet watter isolaat op hul plaas voorkom, kan bosluise vir toetse aan die OVI stuur of per e-pos navraag doen by steynh@arc.agric.za. Hul inligting sal op ’n databasis gebêre word en dié boere kan eerste in aanmerking kom wanneer veldtoetse op beeste begin, sê sy.
27 Januarie 2012
