Dr. Johan Cloete, tegniese veearts van die dieregesondheidsmaatskappy MSD, het op ’n inligtingsdag by die Armoedsvlakte-bultoetsstasie by Vryburg gesê boere moet veral versigtig wees wanneer hulle verse koop, want hulle kan nie vir brusellose getoets word nie. Daarom moet elke stoetery sorg dra dat hulle alle moontlike stappe doen om te verseker die kudde is skoon.
Kliniese tekens van die siekte is aborsies, swak kalwers, metritis, verlaagde vrugbaarheid en melkproduksie, orgitis (ontsteking van die testikels) by bulle en werwelsiektes. Infeksie geskied deur die bek (vreet), oë (vlieë), uier (besmette melk) en geslagsdele (tydens dekking). Inkubasie neem twee weke tot twee jaar.
Cloete het gesê boere kan die risiko van besmetting verminder deur koeie en verse wat gaan kalf betyds uit die kudde te haal en eenkant te hou. Ontsmet dan dié gebied ná kalwing. Verwyder die nageboorte en begrawe dit diep waar diere dit nie kan uitgrawe nie. Ontsmet die hande en arms daarna deeglik.
Twee entstowwe is beskikbaar om die voorkoms van aborsies te verlaag, maar dit voorkom nie brusellose nie. Boere moet goeie bestuur toepas deur besmette beeste te identifiseer, positiewe diere te slag, rekord van dierebewegings te hou en ’n goeie inentingsprogram te volg.
