Die besluit om sy aankoop van onverwerkte melk, asook die produksie van vars melk, ultra-gepasteuriseerde en langlewemelk na 'n nuwe maatskappy oor te dra, is op 'n Clover-raadsvergadering op 28 Februarie goedgekeur.
Mnr. Johann Vorster, uitvoerende hoof van Clover, het op 1 Maart in 'n onderhoud oor die maatskappy se halfjaarresultate gesê boere gaan regstreeks beheer oor dié drinkmelk-bedrywighede hê en hul eie pryse bepaal.
Die nuwe Dairy Farmers South Africa (DFSA) sal na verwagting op 1 Julie vanjaar sy bedrywighede begin. “Boere sal 'n regstreekse verhouding met die kleinhandel kan hê en hul koste kan verduidelik.”
Kwotastelsel oorgeplaas
Clover gaan sy kwotastelsel na DFSA oorplaas en die drinkmelkprodukte sal by Clover-aanlegte geproduseer word.
Clover sê hy sal ná die herstrukturering nie meer aan die sikliese aard van die laemarge-bedrywighede blootgestel wees nie.
Clover sê in 'n verklaring oor sy halfjaarresultate hy moes verlede jaar sy pryse aan melkboere verhoog om die primêre sektor te beskerm, wat swaar gekry het weens die droogte en gevolglike hoë voerpryse.
Verbruikers was egter weens die stram ekonomie platsak, en Clover kon dié en ander hoër insetkoste, soos duurder verpakkingsmateriaal, nie deur hoër produkpryse verhaal nie.
Verkope onder druk
Koeler weersomstandighede en aggressiewe prysmededinging in die mark het Clover se verkoopsvolume egter onder druk geplaas.
Die maatskappy se inkomste het in die ses maande tot einde Desember 2016 met slegs 2,1% gestyg, terwyl sy bedryfswins met 5,2% gedaal het en sy kernverdienste per aandeel met 14,7%.
Volgens Vorster is die sekondêre suiwelbedryf te gefragmenteer en is verandering nodig. “Tenkwaens wat melk oplaai, ry by mekaar verby, en almal ry elke dag winkel toe. Almal se koste is hoog - dit geld die hele voedselbedryf. Die verbruiker betaal te veel.”
Hy sê toe die Amerikaanse ekonomie onder druk was, het konsolidasie op groot skaal plaasgevind, en dit het tot rekordhoogtes op aandeelmarkte gelei.
