Boere in die distrik Ghaap in die Noord-Kaap het aangedui dat hulle ‘n konsultasiegroep sal toelaat om na grondwater op hul plase te soek.
Die Departement van Waterwese en Sedibeng Water het saam ‘n projek onderneem om aanvullende bronne van water in dié provinsie én Noordwes te ondersoek. Dit volg na probleme met watervoorsiening weens onder meer toenemende mynaktiwiteite in die twee provinsies.
Golder Associates, ‘n firma wat omgewingskonsultasiewerk doen, is aangestel om ‘n studie te onderneem om te evalueer of daar genoegsame grondwaterbronne is om die bestaande Vaal Gamagara-massawaterskema aan te vul. Indien dié waterbronne bevestig kan word, sal die groep dit wil ontwikkel.
Nie haalbaar
Gouws sê hoewel die boere ingestem het om die groep se konsultante en navorsers op hulle plase toe te laat, stem hulle nie saam met die aanwending van grondwater vir dié doel nie.
“Boere is bereid om die konsultante toe te laat, mits hulle die nodige protokol volg. Ons het tans ‘n redelik goeie verhouding met hulle, en ons wil dit graag so hou,” vertel Gouws. “Ons meen dit is nie haalbaar dat van ons grondwater in die sisteem ingepomp word nie. Hulle moet ander bronne soek.”
Gouws sê boere in dié distrik sal hulle wel nie teësit vir die ondersoeke nie, aangesien ondersoeke na die stand van grondwater nodig is. Die resultate van die ondersoek sal later vanjaar beskikbaar wees, en Gouws sê hulle het op ‘n opvolgvergadering aangedring.
28 Februarie 2012
