Me. Heleen van As van die plaas Klipfontein tussen Swellendam en Malgas sê hulle het 89 mm gekry, terwyl mnr. Pietie Uys van die plaas Kliprivier, Swellendam, 58 mm gemeet het.
Mnr. Adriaan Steyn van Wankie Boerdery, Heidelberg, het 30 mm en 60 mm gemeet. Tussen Caledon en Riviersonderend het dit ook goed gereën. Mnr. Abrie de Wet van GAF Boerdery by Caledon het Woensdagoggend 61 mm gemeet, en mnr. Janneman Fourie van die plaas Mierkraal het 60 mm gekry.
By mnr. Kosie van Zyl van Napier, waar dit 55 tot 68 mm gereën het, is dit “lekker nat”. In Namakwaland, wat vanjaar ’n vreemde en taai reënjaar ondervind, sê me. Anlie Genis van die plaas Brakkies, Kamieskroon, hulle het 60 mm gemeet, terwyl hul bure 75 mm reën gekry het.
Mnr. Cobus Bester van UD Boerdery by Moorreesburg sê hulle het net 5 mm reën gekry, maar dis darem nadat hulle verlede week 49 mm gekry het. By Eendekuil het dit nog nie baie gereën nie. Mnr. Anton Mouton van die plaas Piekenierskloof het 5 mm reën gemeet, en by mnr. Thys Grobbelaar van die plaas Koringkloof het dit op 21 Julie 9 mm gereën en op 27 Julie 7 mm. “Al is dit min reën, sal dit help as dit nog vir twee maande kan aanhou reën.”
Weerwebwerwe het reën vir Eendekuil voorspel vir 28 Julie en 3 Augustus.
