Boere wat negatief is oor die landbou kan maar hul grond verkoop, het prof. Johan Willemse van die Universiteit van die Vrystaat onlangs gesê.
‘‘Mense wat suksesvol is in besigheid is positief. As jy negatief is, verkoop jou plaas, want jy gaan verkeerde besluite neem,’’ waarsku hy.
Willemse was ’n spreker by die Nedbank-besigheidsete op die Bien Donné Agri Kaap Week, by Franschhoek.
Pleks van om die heeltyd te kla oor negatiewe goed, moet boere eerder fokus op dit wat hulle kan verander, het hy bygevoeg. ‘‘Dit help nie om net te praat en vas te haak by die drama en probleme nie; boere moet eerder fokus op waar hulle in die toekoms wil wees en daarheen werk.’’
Hy sê egter dit gaan op die oomblik baie goed met die landbou: ‘‘Die landbou is een van die min bedrywe waar besigheid groei. Landboupryse het meer onbestendig geraak, maar na bo, nie onder nie. Verder raak mense al hoe ryker, wat beteken dat hulle anders eet – nie meer mieliepap nie, maar vleis en wyn.
"Namate die vraag na vleis toeneem, sal die vraag na graan ook toeneem. Om dit in perspektief te stel, Suid Afrika produseer tans 7 000 ton sojabone per jaar. China voer 60 miljoen ton per jaar in.”
Mnr. Ernst Janovski, hoof van Agri-besigheid by ABSA, het beaam dat die landbou tans in’n gunstige siklus is: ‘‘Kommoditeitspryse het sedert 2000 gestyg. Verder het die sterker vraag gelei tot ’n situasie waar voorraadvlakke die laagste in jare is.’’
Willemse het gesê dat dit waar is dat Europa besig is om dood te gaan, maar daarop gewys dat daar baie nuwe geleenthede in die Ooste lê: ‘‘Indië, byvoorbeeld, het oor die afgelope paar jaar ekonomiese groei van 7% tot 8% getoon. Dit maak 50% in net vyf jaar teenoor niks in die meeste Europese lande.”
Suid-Afrika is ook nie so slegte plek om in te wees. Willemse sê skuldvlakke van baie van die groot lande wat nou in finansiële krisis is, is tussen 80% en 200% van die bruto binnelandse produk (BBP). Suid Afrika se skuldvlakke is maar net 40% van die BBP. Janovski het bygevoeg dat boere tans geld maak, dat die skuldlas-verhouding goed lyk en dat grondpryse besig is om te styg.
24 April 2012
