In vandag se landbouwêreld is dit nie meer goed genoeg om bloot die bestaande grond-ekostelsel te bewaar nie. Daarom kom herlewingslandbou, die jongste beweging in die landbou, in Boereplanne 2017, nou beskikbaar, in die kollig.
“Die hoeveelheid planne waarmee ons boere vorendag kom, is verbysterend. Hoe hulle weke lank sal sit en tob oor 'n probleem, voor die oplossings hulle tref.
“Van sojaplanters tot kripskoonmakers, outomatiese skaapvoerders en verspot maklike klampe vir moeilike waterpyplaste – altyd aangevuur deur die gedagte dat dit goedkoper is om iets self te bou as om dit nuut te koop,” skryf mnr. Chris Burgess, hoofredakteur.
'n Boer maak 'n plan
In die uitgawe van die gewilde tydskrif kan lesers ook meer uitvind oor planne wat boere gemaak het (en steeds maak) om die droogte van die afgelope paar jaar te oorleef.
Lees onder meer hoe mnr. Robert Zulch, ‘n vrugteboer van die plaas Wakkerstroom in die Witzenbergvallei naby Ceres en voormalige Boer van die Jaar, verduidelik hoe hy sy boerdery volhoubaar bestuur te midde van die ergste droogte in dekades.
Mnr. Christi van den Heever, oorhoofse bestuurder van die Romansrivier-boerdery, deel van die Graaff Fruit-groep by Wolseley, verduidelik hoe hy sy besproeiing verminder het tot ver onder die bedryfsgemiddelde.
Verder is daar oudergewoonte ’n keur van meer as 50 boereplanne wat in Landbouweekblad verskyn het – van energie- en waterslimoplossings tot toerusting vir veeboere en gewasprodusente.
Boereplanne 2017, die derde uitgawe van die tydskrif, is beskikbaar teen R45. Koop die tydskrif op die Landbouweekblad-winkel of rig ‘n epos aan Johan Terblanche by johan.terblanche@media24.com.
