Die onbetrokkenheid van boereverenigings is kommerwekkend, het mnr. André Botha, voorsitter van Agri Gauteng, op dié provinsiale landbou-organisasie se kongres in Pretoria gesê.
“Die landbou in Gauteng het ’n goeie toekoms. Boere van dié provinsie kan die vasteland omdraai, maar ek pleit by julle: Raak betrokke,” het Botha gesê.
“Verlede September het ek gepleit dat boereverenigings by plaaslike owerhede betrokke moet raak. Ons moet onsself afvra wat ons gedoen het om ’n verskil te maak. Dit help nie om te sit en te praat oor die wanbesteding van munisipale geld nie. Boereverenigings kan die sake beïnvloed wat op plaaslike vlak gebeur,” het Botha gesê.
Hy sê ’n plaaslike regering kan ’n groter invloed op ’n boer se lewe hê as wat hy of sy sou wou hê. “As jy nie plaaslik betrokke raak nie, gaan jy probleme ondervind. Dit is tyd dat almal betrokke moet word gegewe die uitdagings wat voor ons lê.”
Agri Gauteng het nie vanjaar ’n Boerevereniging van die Jaar aangewys nie.
13 September 2010
