‘n Vermeende rower, wat saam met drie ander verdagtes op ‘n plaas naby Wesselsbron ingebreek het, is moontlik verlam nadat die boervrou hom geskiet het.
Luidens ‘n berig op News24.com het die 51 jarige me. Cecelia Steynberg vroeg Woensdagoggend (29 September) wakker geword omdat hulle twee honde geblaf het.
Sy het onraad vermoed en haar vuurwapen uit die kluis gehaal, waarna sy in die bed geklim het. Sy was alleen, aangesien haar man, Callie, deur die week in Kroonstad werk. Steynberg kon hoor hoe die veiligheidshek in die gang na die slaapkamer oopgebreek word. Die verdagtes het glo toegang tot die huis gekry deur die diefwering voor die TV-kamer se venster oop te breek.
Skoot stop hom nie
Soos wat die rower in die kamer ingeloop het, het Steynberg op hom geskiet, maar hy is nie gewond nie. Hy wou ‘n skoot afvuur, maar sy vuurwapen wou glo nie werk nie. Die man wou haar steeds aanval, en Steynberg het met die man sowat ‘n meter van haar weg ‘n tweede skoot gevuur en hom in die nek gewond.
Steynberg kon nie die plaasbestuurder in die hande kry nie, want hy het in die hoenderhokke gewerk. Sy het haar man in Kroonstad gebel, en hy het die gemeenskap gemobiliseer.
Die Polisie het Steynberg se voertuigsleutels, ‘n onwettige vuurwapen en iemand anders se lisensie in besit van die gewonde rower gevind. ‘n Tweede verdagte is later die oggend aangekeer, maar die ander twee word steeds gesoek.
30 September 2010
