‘n Saak rondom ‘n belastingdispuut is ná 10 jaar afgehandel en kan die landboumaatskappy, NWK, miljoene uit die sak jaag, sê mnr. Danie Marais, besturende direkteur.
Luidens ‘n verklaring het Regter CH Lewis verlede week teen die maatskappy uitspraak gelewer in die Hoogste Hof van Appèl (HHA) van Suid-Afrika. “Die uitspraak kom as ’n verrassing nadat die belastinghof op appèl ten gunste van NWK beslis het. Die Suid-Afrikaanse Inkomstediens (SAIS) het na dié uitspraak appèl na die HHA aangeteken,” aldus Marais.
Die saak
Die saak handel oor ‘n ooreenkoms wat die maatskappy met Eerste Nasionale Bank (ENB) aangegaan het.
Luidens ‘n berig op Times Live het ENB en NWK ‘n lening vir R50 miljoen in so ‘n mate gestruktureer dat NWK rente vir ‘n lening van ‘n bedrag van R96 miljoen kon aftrek. Dit het die maatskappy glo in die tydperk van 1999 tot 2003 ‘n belastingvoordeel gegee, terwyl ENB na bewering ‘n wins van R600 000 gemaak het.
Volgens die verklaring is ‘n aftrekking wat vir inkomstebelastingdoeleindes gemaak is nie deur die SAIS toegelaat nie en gevolglik moes die maatskappy die belasting op dié uitgawe betaal.
“NWK is ook nou aanspreeklik vir ’n boete van 100% van dié belastingaanspreeklikheid plus rente. ’n Finale bedrag is nog nie bepaal nie, maar kan ongeveer R50 miljoen beloop,” lui die verklaring.
Ander transaksies
Marais sê dié uitspraak kan verreikende gevolge rondom belasting hê vir ander maatskappye wat soortgelyke transaksies met finansiële instellings aangegaan het. Handelsbanke en ander finansiële instellings wat ook dié tipe transaksies voorgestel en bemark het, sal ook onder skoot kan kom.
Die maatskappy oorweeg tans nog sy opsies.
9 Desember 2010
