Die brand wat die Boland sowat vyf dae lank al teister, woed steeds voort, hoewel dit grootliks onder beheer is.
Luidens ’n berig in Die Burger moes brandweermanne Woensdag (11 Januarie 2012) bontstaan om te keer dat vlamme wat weens temperature van 36 °C opgevlam het, buite beheer raak.
Volgens die berig is dié brand die grootste in die omgewing die afgelope 10 jaar. Sowat 150 brandweerbeamptes en vier helikopters is al gedurende die week gebruik om die brand te help blus. ’n Groot deel van die Hawekwaberge naby Wolseley het reeds in die slag gebly.
Beheer
Mnr. Carl Opperman, hoof uitvoerende beampte van Agri Wes-Kaap, sê volgens die jongste inligting wat hulle ontvang het, is die brand grotendeels onder beheer.
“Dit is vandag (Donderdag, 12 Januarie 2012) koeler en die wind waai nie so erg soos die vorige dae nie, so dit is goeie tekens vir die weerstoestande.”
Mnr. Roysten Harris, stasiebevelvoerder van die Kaapse Wynland-distriksmunisipaliteit se brandweerdiens, het wel aan die koerant gesê dat van die brandweerpersoneel Woensdag ’n noue ontkoming met die vlamme gehad het, maar geen ernstige voorvalle is aangemeld nie.
“Hulle kon die vlamme onder beheer kry. Dit lyk tans ’n bietjie beter hier. Die res van die brand (in die plantasie) word gemonitor sodat dit nie weer kan opvlam nie,” aldus Harris.
Bron: Die Burger
12 Januarie 2012
