Enkele geringe veldbrande is Vrydag, 12 September, in die Vrystaat aangemeld, nadat die verskeie wegholbrande wat in dele van die provinsie buite beheer gewoed het, geblus is.
Mnr. Thinus Steenkamp, hoofbestuurder van die Vrystaatse sambreel-brandbestrydingsvereniging,
sê hy het berigte ontvang van brande wat in die omgewing van Clocolan en by Bethlehem bestry word. Die meeste brande is laat Donderdagmiddag en deurnag deur boere, plaaswerkers en brandbestrydingspanne van Working on Fire (WOF) in bedwang gebring.
Hy sê ’n groot brandgevaar bestaan nog met die warm en droë toestande wat vandag oor die provinsie heen voortduur.
Steenkamp het ’n beroep gedoen dat grondeienaars ’n wakende oog hou dat die brande nie weer in die afgebrande dele van die distrikte Clocolan, Ladybrand, Bethlehem, Senekal en Dewetsdorp opvlam nie.
