Die groot aantal veldbrande wat die Vrystaat sedert die naweek teister is onder beheer, maar groot skade is aangerig.
Mnr. Malcolm Procter, adjunk-direkteur van bos- en veldbrandtoesig by die provinsiale departement van landbou, bosbou en visserye, sê twee van die 20 brande wat voorgekom het woed voort.
“Twee van die brande naby Rosendal, wat in die rigting van Fouriesburg beweeg, is nog nie geblus nie. Hulle is egter nou onder beheer en beweeg teen sowat 5km/h.” Procter sê nog ‘n brand het Dinsdag (7 September) in die omgewing van Ficksburg voorgekom, maar dit is geblus.
Kommer oor die Dihlabeng-omgewing
Volgens Procter heers daar kommer oor die uitwerking van die brande op die Dihlabeng munisipale distrik, wat Bethlehem insluit. “Die munisipaliteit brand gewoonlik sowat 31 000 ha per jaar. Hy staan klaar op 88 000 ha vir die jaar. Dit is meer as die helfte meer en die brandseisoen is nog nie verby nie.”
Procter meen dit gaan ‘n groot uitwerking op boerderybedrywighede hê. Sedert Saterdag het sowat 65 000 ha in die omgewing van Fouriesburg, wat deel is van die distrik, afgebrand.
Rampgebied?
Procter sê die departement gaan aansoek doen om die dele wat onder die brande deurgeloop het, as rampgebiede verklaar te kry. “Volgens internasionale standaarde moet dit as ‘n rampgebied verklaar word.”
‘n Groot aantal diere het in die betrokke gebiede doodgebrand, en verskeie plase het totaal afgebrand.
8 September 2010
