Altesaam 400 357 ha het vanjaar reeds in die slag gebly weens veldbrande in die Vrystaat, met sover twee sterftes wat aangeteken is, sê die provinsiale departement van landbou, bosbou en visserye.
Mnr. Malcolm Procter, adjunk-direkteur van bos- en veldbrandtoesig sê: “Dit is definitief ‘n nuwe rekord vir die provinsie, en ‘n groot deel van die Vrystaat is as ‘n rampgebied verklaar weens die brande.”
Hy sê in die afgelope vier dae het 76 000 ha afgebrand waarvan 30 000 ha in die Bethlehem-gebied was.
Volgens vroeëre inligting wat Procter aan Landbou.com verskaf het, brand sowat 150 000 ha gewoonlik per jaar in dié provinsie.
Lewensverlies
Procter sê tot dusver is twee sterftes in die provinsie aangeteken, met sewe mense wat ernstige brandwonde opgedoen het. ‘n Plaaswerker van Heilbron wat verlede maand op ‘n trekker deur ‘n brand op ‘n trekker oorrompel is, het aan sy wonde beswyk.
Luidens ‘n berig in Volksblad (12 Oktober) is mnr. Jaco Nortjé, ‘n 21-jarige boer van Betlehem, Sondag (10 Oktober) deur ‘n brand oorrompel en het hy baie ernstige brandwonde opgedoen. Hy is Maandag (11 Okotber) weens sy beserings in ‘n hospitaal in Bloemfontein oorlede.
Volgens Procter is twee van die sewe beseerdes boere van Soutpan en Boshof, wat tans in intensiewe sorgeenhede behandel word. Die boer van Boshof is Donderdag (7 Oktober) deur ‘n brand in sy bakkie oorval, en hy het 45% brandwonde oor sy liggaam opgedoen. Die boer van Soutpan is oor die naweek deur ‘n brand oorval, en hy het 32% brandwonde opgedoen. Nog ‘n plaaswerker van Bethlehem het 70% brandwonde opgedoen.
Procter sê veeverliese word op minder as 50 geskat, maar twee motors, ses bakkies, vier trekkers en 50 gholfkarretjies is al in die brande verwoes.
Persoonlike veiligheid
Procter rig ‘n ernstige versoek aan boere en ander individue wat brande bestry om hul eie veiligheid eerste te stel.
“Moenie enige nylon-klere dra nie, die vuur smelt dit en dit brand aan jou vel vas. Katoen is die veiligste keuse. Moet nooit ‘n brand kaalvoet probeer bestry nie. Dra verkieslik leerskoene, aangesien plastiekskoene ook in jou vel kan inbrand. Beplan vinnig voordat jy die brand begin blus hoe jy dit gaan doen en maak seker jy het ‘n ontsnappingroete sou die brand te erg raak,” waarsku Procter.
Lees ook ons berig oor brande wat in Limpopo woed.
12 Oktober 2010
