Diesel gaan tot 12c per liter duurder wees in November, terwyl die petrolprys met 20c per liter gaan styg.
Die Departement van Energie het Vrydag (29 Oktober) dié prysstygings, asook ‘n prysstyging van 13c per liter vir paraffien, aangekondig.
Die styging sal van 3 November van krag wees.
Die redes vir die styging
Mnr. Tony Twine, senior ekonoom van Econometrix, sê die petrolprys styg skerper aangesien die internasionale olieprys die afgelope maand na ‘n hoër vlak as in die derde kwartaal, gestyg het. Hy sê hoewel die rand die afgelope paar weke sterk is, was dit nie genoeg om die styging in die oliepryse uit te kanselleer en stygings in brandstofpryse teen te werk nie.
“In die derde kwartaal het die internasionale olieprys tussen $72 en $78 per vat beweeg, maar gedurende Oktober het dit tussen $81 en $85 beweeg. Terselfdertyd het die rand tussen R6,80 en R7,06 beweeg tot die dollar,” verduidelik Twine.
Vreemd
Volgens Twine is dit wel vreemd dat die petrolprys meer styg as dié van diesel. Hy sê tradisioneel styg die dieselprys dié tyd van die jaar hoër as die petrolprys, want weens die winterweer in Amerika en Europa neem die aanvraag na diesel toe.
“Ek verwag dat spekulasie in oliepryse iets daarmee te doen het,” verduidelik Twine.
1 November 2010
