Die prys van diesel styg volgende week met tussen 14c en 15c per liter, terwyl petrol 22c duurder sal wees.
Die grootste rede vir dié styging is ’n styging die afgelope vier weke in die internasionale olieprys. Die olieprys was Vrydag (27 Julie 2012) sowat $108 per vat.
Ekonome het vroeër die maand verwag dat die brandstofprys in Augustus weer kan daal, veral na die rand sterk teen die dollar vertoon het en die olieprys onder $100 per vat was.
Die Departement van Energie sê vergeleke met die vorige prysbepalingstydperk het die rand-dollar-wisselkoers die afgelope maand versterk. Die gemiddelde wisselkoers was R8,26 teenoor die dollar.
Kon hoër wees
Volgens die departement het die goeie vertoning van die rand die olieprys teengewerk. Sou die rand nie so goed gevaar het nie, sou die verhoging vir diesel en petrol onderskeidelik 11c en 12c per liter hoër gewees het.
Mnr. Dawie Maree, kommersiële bestuurder by Agri SA, sê dié verhoging beteken ’n verhoging van R140 miljoen per jaar vir insetkoste in die landboubedryf. Hy sê die verhoging is “geensins goeie nuus nie”, veral aangesien verskeie boere tans hul saadbeddings vir nuwe aanplantings moet voorberei.
“Dit sal ook lei tot stygings in ander insetkoste, soos kunsmis,” verduidelik Maree. “Die styging is nie waarop die bedryf óf die verbruiker nou gehoop het nie.”
