Dr. André Jooste, uitvoerende hoof van Aartappels Suid-Afrika, sê al is die bedryf se bydrae tot die land se bruto binnelandse inkomste net 2% tot 3%, kan oorwegings oor die landbou se bydrae tot voedselsekuriteit, werkverskaffing en as verdiener van buitelandse valuta nie buite rekening gelaat word nie.
In sy begrotingsoorsig vir 2014 het mnr. Pravin Gordhan, Minister van Finansies, die hersiening aangekondig van die voorsiening vir die verskaffing van goedere waarop geen belasting gehef word nie. Goedere wat hierdeur geraak word, is: Dierevoer, dieremedisyne, misstowwe, plaagdoders, plante en saad.
Jooste het op die kongres van die Moerkwekersforum in Bloemfontein gesê die bedryf is met Tesourie en die Suid-Afrikaanse Inkomstediens in gesprek. “Dit is bemoedigend dat die parlementêre komitee op finansies kennis geneem het van die uitwerking van die voorgestelde gewysigde wetgewing,” sê Jooste.
Die huidige versoek aan die Regering is dat die status quo gehandhaaf word totdat die volle uitwerking van die wetgewing duidelik is. Indien BTW van 14% ingestel word op dié landbouprodukte, is bepaal dat die bykomende koste aan landbou om misstof te bekom, R882 miljoen meer sou beloop en vir chemikalieë R1.19 miljard meer.
Volgens Jooste sal die bykomende koste aan rente op R74 miljoen en R101 miljoen te staan kom ten opsigte van misstowwe en chemikalieë respektiewelik indien produsente die bykomende kontantvloei wat benodig sal word, teen ’n rentekoers van 8.5% sal moet leen.
Die totale lopende koste vir aartappelmoere, chemikalieë en misstof beloop R2,4 miljard. Indien BTW teen 14% ingestel word, sal die totale bykomende koste (kontantbehoefte) met R338 miljoen verhoog. Dit kan herlei word na ’n bykomende gemiddelde kontantvloeibehoefte van R564 047 per aartappelprodusent, sê hy.
