’n Ondoeltreffende regeringsburokrasie staan loshande bo-aan die lys van struikelblokke om in Suid-Afrika sake te doen, sê mnr. Robin Barnsley, uittredende voorsitter van Kwanalu.
Hy het op Kwanalu se kongres in Pietermaritzburg gesê ander sleuteluitdagings is ’n arbeidsmag sonder genoegsame opleiding, tesame met ’n swak werksetiek en beperkende arbeidswetgewing, misdaad en diefstal, korrupsie en probleme om toegang tot finansiering te kry.
“Terwyl hierdie faktore in alle sektore van die nasionale ekonomie inslag vind, wil dit voorkom of die landbousektor in ’n groter mate daardeur beïnvloed word.”
Ontoereikende grondhervormingsproses
Hy sê die afgelope jaar was ook ’n voortsetting van die “ontsettend ontoereikende” wyse waarop die grondhervormingsproses bestuur is.
“Die byna jaarlikse lys van aantygings oor die gedrag van wit kommersiële boere duur voort in die poging om die voorgestelde implementering te regverdig van bykomende maatreëls wat, soos die Regering beweer, die grondhervormingsproses sal verhaas.”
Barnsley sê die neiging van Suid-Afrikaanse boere om hul bedrywighede na ander lande uit te brei, moet as ’n tydige en goedbedoelde boodskap aan die Regering dien oor die beweeglikheid van kapitaal en kundigheid.
Die nuwe voorsitter van Kwanalu is mnr. Brian Aitken van Melmoth (links). Hy neem oor by mnr. Robin Barnsley (regs) wat uittree as voorsitter maar aanbly as een van die onder-voorsitters. Die ander onder-voorsitter is mnr. Phenias Gumede. Foto: NICO VAN BURICK
16 September 2011
