Daarom sal hy steeds voortgaan om te help, sê mnr. Burre Burger, ’n sakeman van Vredendal wat sedert Maart 2017 reeds 909 vragte voer, mielies en ander droogtehulp tot in die verste uithoeke van die land afgelaai het.
Hy het sy dank uitgespreek teenoor die klein boeregemeenskap van Migdol in Noordwes wat hul harte en hande oopgemaak het en net minder as R1 miljoen met ’n droogtehulpfees ingesamel het. Migdol se droogtehulpfees by Suidwes Landbou se silo’s op dié dorp is ondanks gure weer deur meer as 1 200 mense bygewoon en daar is heerlik feesgevier soos net die platteland kan.
“Dis net soos Suid-Afrikaners is, ons sal ’n fees van enigiets maak, solank daar musiek en braaivleis is,” skerts Burger.
Mnr. Retief Riekert, ’n boer van Migdol en lid van die plaaslike boerevereniging, was die stille krag agter dié fees, wat ook gespog het met ’n veiling van diere wat deur boere geskenk is wat self vroeër in nood was. Die afslaers André Kock en Seuns het die veiling behartig wat R200 000 ingebring het.
“Dit was net een oggend toe ek opstaan op my hart gelê dat ek iets moet doen om daardie boere wat steeds swaarkry te help, en toe reël ons ’n fees,” vertel Riekert.
Boere van Williston, waar dit steeds baie droog is, het onder meer 100 skape vir die veiling geskenk om dankie te sê vir hulp wat hulle ontvang het toe die nood op sy hoogste was.
Riekert sê verskeie kunstenaars wat opgetree het, het ook hul harte oopgemaak en hul dienste gratis gelewer.
Jagpakkette wat opgeveil is, het ook goeie aftrek gekry.
Volgens mnr. Deon Badenhorst, bestuurder van koöperatiewe bemarking en kommunikasie by Suidwes Landbou, wat die terrein vir die fees beskikbaar gestel het, is dié maatskappy bewus van lede en gemeenskappe waar vee weens droogte vrek. “Dit is veral in die Noord-Kaap waar hulp dringend benodig word.”
Sy siening word deur Burger beaam. “Die Noord-Kaap is steeds baie droog. ’n Gebied soos die Richtersveld se weiding is tot niet. Dit het daar ses jaar laas behoorlik gereën.”
Hy vertel van sy swaer en suster, Suan en José Nel, wat tussen Loeriesfontein en Lospers boer, op ’n plaas wat Waterkuil heet – en danksy daardie einste waterkuil darem nog water vir hul vee het. “Hul seuntjie Jacobus is nou vier jaar oud en hy net anderdag die eerste keer reën gesien.”
Volgens Burger is daar ook groot nood in distrikte soos Beaufort-Wes, Aberdeen in die Oos-Kaap en Bitterfontein in die Wes-Kaap. “Dit reën net kol-kol vanjaar. Daar is dus steeds dringend hulp nodig.”
Hy bereken die waarde van die vragte droogtehulp wat aangery is, op R65 miljoen en sê dat hy uiters dankbaar is vir almal wat hulp aanbied.
In ’n musiekvideo wat hy onlangs op sosiale media geplaas het, word boere in droogtegebiede aangemoedig met die woorde: “Laat die droogte kom, ons staan reg.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
