Benewens die “uitstekende” Karooplase by Carnarvon, Van Wyksvlei en Fraserburg wat opgeveil word, is daar ook ’n wild-en-weidingsplaas by Vryburg, luidens die afslaer se advertensie.
Dit volg op Van der Merwe en sy entiteite (Merwede Trust en die maatskappye Velvetcream en Project Multiply) se ingewikkelde likwidasiegeding teen die Land Bank aan wie hy meer as R80 miljoen skuld. Die bank, wat 95% van sy skuld hou, het in die hofsaak aangevoer Van der Merwe het sedert 2018 “nog nie ’n sent terugbetaal nie”.
Die saak is gekenmerk deur Van der Merwe se beskuldigings dat wetgewing teen hom werk en dat die Land Bank hom nie ’n kans wil gun om sy boerdery met sy eie sakereddingsplan te red nie. Nadat sy sakereddingsplan ook deur die hooggeregshof in Kimberley verwerp is, is hy en sy entiteite in Oktober verlede jaar finaal gelikwideer en gesekwestreer.
