Mnr. Stuart Dewing, ’n wolboer van Cathcart, is in Port Elizabeth as die wenner van die Ermenegildo Zegna-fynwolkompetisie vir 2010 aangewys.
Die Zegna-groep is een van die wêreld se grootste verbruikers van ekstrafyn-Merinowol en is ’n toonaangewer in die vervaardiging van fynwolkleedstowwe.
Die wenvag was 15,1 mikron en het 3kg geweeg.
Die naaswenner was mnr. Willem van Aardt van die fynwolstoet Fairworld van Cook House en sy seun Acton, gevolg deur mnr. Crighton Pringle van die plaas Thorndale, Adelaide.
Stuart en sy pa, wyle mnr. Bruce Dewing, is in 2009 ook as die wenners van die kompetisie aangewys. Die Dewings het in 2008 die Suid-Afrikaanse been van Zegna se internasionale fynwolkompetisie, die Zegna VA Challenge, gewen en is as naaswenner in die internasionale kompetisie bekroon.
Om produsente aan te moedig
Die doel van die Zegna-woltrofee is om produsente aan te moedig om fyner te teel en die gehalte van hul wol te verbeter. Punte word volgens ’n glyskaal toegeken vir veseldikte, gewig, treksterkte en eenvormigheid in die stapel. Veseldeursnee tel die meeste punte, nl. 50 uit ’n totaal van 100.
Ermenegildo Zegna se wolmeule is in 1910 in Trivero, ’n klein Italiaanse dorpie in die Alpe, opgerig en word sedertdien deur die familie bedryf. Die maatskappy het sy eerste fynwolkompetisie in 1963 in Tasmanië, Australië geloods.
Vandag is die Zegna-groep het sowat 5 000 mense oor die wêreld heen in diens. Die maatskappy verwerk ook ander natuurlike vesels soos kasjmier uit Mongolië, Suid-Afrikaanse bokhaar en die skaars en die eksklusiewe vikoenjahaar.
29 Oktober 2010
