Die bedryf van die Sentrale Wapenregister is glo in chaos gedompel weens bevorderings, aldus die Demokratiese Alliansie (DA).
Luidens ’n mediaverklaring sê die party hy is ingelig dat die meeste van die personeel by die register glo bevorder is, wat glo niemand laat om die lisensies te behartig nie.
Verder is wagwoorde op rekenaars glo ook verander. Me. Dianne Kohler-Barnard, woordvoerder vir die DA, sê dit wil voorkom of die telefone afgesny is, want verskeie pogings om die polisie-eenheid te bel, het geen vrugte afgewerp nie.
Kohler-Barnard sê dié situasie volg glo op ’n aankondiging van mnr. Nathi Mtethwa, Minister van Polisie, in November 2010 dat die eenheid heeltemal “oorgedoen” gaan word, “van die topstruktuur tot op stasievlak.”
Onregverdig
Kohler-Barnard sê dit is ’n duidelike teken dat nie die minister of die register die motivering of vermoë het om die ernstige uitdagings binne die eenheid aan te pak nie. Dít, terwyl duisende wettige wapeneienaars jare lank wag vir hul wapenlisensies wat iewers in bokse by polisiestasies lê.
“Onredelike vertragings en afgekeurde lisensies waarvoor geen redes verskaf word nie, is nie in die beste belang van mense wat beskerming van geweldadige misdadigers vereis nie,” aldus Kohler-Barnard.
Vrae in dié verband sal aan die minister gerig word. Kohler-Barnard sê die party sal die moontlikheid van ’n forensiese oudit van die implementering van die Wapenbeheerwet en die stand van sake by die register ondersoek.
13 Februarie 2012
