Die Departement van Landbou, Bosbou en Visserye werk daaraan om sy inspeksiediens van ongeregistreerde chemiese middels te verbeter, sê mnr. Jonathan Maluta Mudzunga, Registrateur van Wet 36 van 1947 wat dié bedryf reguleer.
Dít kom nadat dr. Gerhard Verdoorn, hoof van die Griffon-gifinligtingsentrum en ‘n consultant vir die Plantbeskermings- en Dieregesondheidsvereniging (Avcasa), gewaarsku het dat al hoe meer ongeregistreerde en gevaarlike plaagdoders onwettig uit Indië, China, Turkye en Pakistan ingevoer of op landbouskoue geadverteer word.
Volgens Verdoorn is daar net 14 inspekteurs wat Wet 36 moet afdwing, terwyl daar 50 tot 60 behoort te wees. Mudzunga het by navraag geantwoord daar is wel departementele inspekteurs wat inspeksies by die land se toegangspunt doen. Dit is benewens inspekteurs wat binnelands die wet afdwing. Hy het bevestig dat daar talle onwettige chemiese landboumiddels by doeanepunte asook binnelands gevind word. “Dit is egter moeilik om te sê of dit wel aan die toeneem is.”
Die department se optrede sluit beslaglegging en weiering van toegang in. Party oortreders word aan die Nasionale Vervolgingsgesag oorhandig. Die department het as deel van sy verstewiging van grensbeheer met verskeie bewusmakingsveldtogte onder invoer-agentskappe, munisipaliteite en die publiek begin.
Hy het ook sy werksverhouding versterk met die ander agentskappe soos die SA Polisiediens en die inkomstediens, wat vir grensbeheer verantwoordelik is. Mudzunga het bevestig dat produkte uit die buiteland onwettig op landbouskoue geadverteer word. Sulke maatskappye is gewaarsku en die skou-organiseerders is genader om dit te keer.
27 September 2010
