Ná agt jaar van onderhandelinge en tegniese probleme het die SA Appel- en Peerprodusentevereniging (SAAPPA) ’n protokol onderteken wat appeluitvoer na China moontlik maak.
Plaaslike appels kan so gou as volgende jaar al na China uitgevoer word, sê mnr. Anton Rabe, uitvoerende direkteur van Hortgro.
Die Minister van Landbou, Bosbou en Vissery, mnr. Senzeni Zokwana, en die Minister vir Kwarantyn AQSIQ in Beijing, mnr. Zhi Shuping, het die protokol onderteken.
Marktoegang tot China is al langer as ’n dekade ’n groot voorkeursaak vir die appelbedryf. Dit sal ook as afskopplek dien vir toegang tot ander Asiese markte.
Rabe sê Chinese kwarantyn-amptenare het Suid-Afrika vroeër vanjaar besoek. Die bedryf het daarna begin om die vereiste boord- en uitvoerregistrasielyste voor te berei sodat dit gereed is wanneer die AQSIQ-amptenare daarvoor vra.
“Sodra die Chinese kwarantyn-amptenare dit goedgekeur en afgeteken het, kan uitvoer dadelik begin.”
“Op die oomblik word appels na agt primêre markte uitgevoer. Dis Afrika, die Verre Ooste en Asië, die Verenigde Koninkryk, Midde-Ooste en Europa. Kleiner volumes gaan ook na die Indiese Oseaan Eilande, Amerika en Kanada. Deur China tot hierdie lys te voeg, skep ’n enorme geleentheid om meer werkgeleenthede in die primêre en sekondêre landbou te skep,” lui ’n verklaring deur Hortgro.
Die organisasie glo toegang tot meer markte sal nuwe aanplantings in die bedryf stimuleer en ook positief wees vir grondhervorming.
’n Soortgelyke proses as vir appeluitvoere na China is ook vir pere geloods en steenvrugte sal ook volg.
“Daar is vertroue dat die proses om verdere protokolle te formaliseer sal versnel, aangesien die vrugte-uitvoerbedryf bewys het hy voldoen aan internasionale beste praktyke vir voedselveiligheid en plantgesondheid,” sê Rabe,
