Boere wat melk aan Clover lewer, kan van volgende maand af na ’n styging van 20c per liter uitsien.
Mnr. Manie Roode, adjunk uitvoerende hoof, sê die styging volg as deel van die maatskappy se deurlopende evaluering van produksiekoste en die volhoubaarheid van die bedryf.
“Die verhoging hou verband met ons voorneme om die oorlewing en voortbestaan van ons boere te verseker, asook vir volhoubare melkvoorsiening,” verduidelik Roode.
Hy sê die bottervet-inhoud van die melk wat elke boer lewer, bepaal hoeveel die boer per liter bepaal word. “Van ons boere kry tot R3,50 per liter.”
Heroorweeg
Roode sê prysstygings of -verlagings is op spesifieke modelle gegrond. Dit word maandeliks nagegaan en heroorweeg. “Al die veranderlikes, soos die prys van mielies en die kontrakte wat op die termynbeurs Safex gesluit word, word in ag geneem. Na gelang wat met dié pryse gebeur, word aanpassings gedoen.”
Roode sê met die voorgenome styging is veral die stygende prys van mielies in ag geneem. “Sou die prys van mielies volgens die Safex-kontrakte weer daal, sal ons ons prysposisie heroorweeg.”
7 Februarie 2012
