Clover se plaashekpryse het van Februarie tot April vanjaar met 15% gestyg, maar die maatskappy het ’n moeilike jaar agter die rug en sy bedryfswins het met 24% gedaal.
Enige verdere bewegings rondom produsentepryse sal afhang van hoe die aanbod van melk verander, het mnr. Johann Vorster, hoof uitvoerende beampte, ná die bekendmaking van die maatskappy se finansiële resultate gesê.
Clover het, soos ander melkkopers, begin vanjaar produsentepryse verhoog toe dit duidelik word melkproduksie krimp weens boere se winsmarges. Clover het ook in die winter ’n tydelike droogtepremie van 2c/liter aan boere in die Oos-Kaap betaal.
Vorster sê weens die tekort aan melk het kwaai mededinging onder kopers ontstaan en dit is hoekom Clover sy pryse met meer as inflasie verhoog het. Terselfdertyd is verbruikers nog onder druk, daar was ’n prysgeveg tussen kettingwinkels oor pryse vir langlewemelk, en Clover het ook ander kostestygings in die twaalf maande tot 30 Junie vanjaar gehad.
Die maatskappy moes 17% meer aan verpakking bestee en 12% meer aan die oplaai van melk, hoofsaaklik weens duurder brandstof. Vervaardigingskoste het met 10%gestyg.
Clover se wesensverdienste per aandeel het in die jongste boekjaar met 14,3% tot 102,7c gedaal.
Die maatskappy het 'n finale dividend van 16c verklaar, wat die totale dividend op 32c te staan bring – dieselfde as die vorige jaar.
Vorster het gesê die tekort wat Clover in die winter aan kaas en langlewemelk gehad het, was onder meer omdat van sy boere net voor die winter na Danone oorgegaan het.
Vorster sê Suid-Afrika is “ 'n fantastiese melkbron” en kan as suiwelproduksieland net so goed soos Nieu-Seeland wees.
