Clover Industries Limited behoort teen 14 Desember 2010 op die Johannesburgse Effektebeurs (JSE) gelys te word.
Mnr. Johann Vorster, uitvoerende hoof van die maatskappy, sê gewone aandele sal onder ‘CLR’ in die voedselindustrieë-kategorie gelys word, en voorkeuraandele onder dié sektor van die hoofraad onder die kode ‘CLRP’.
Dié stap sal plaasvind in samewerking met ‘n aanbod om inkomste tot R500 miljoen te verhoog deur ‘n private plasing van nuwe gewone aandele in die maatskappy se aandelekapitaal. Sowat 47 619 000 nuwe gewone aandele maak deel van die aanbod uit, en dit sal sowat 27,7% beslaan van die totale aandele wat op die JSE beskikbaar sal wees.
Rand Merchant Bank is die hoofadviseur en die boekbestuurder vir die aanbod. Die prys vir dié aandele sal tussen R9,00 en R12,00 per aandeel wees. Die finale prys sal bepaal en aangekondig word sodra die aanbod na verwagting op 9 Desember 2010 afgehandel sal word.
Wie kan koop?
Volgens ‘n verklaring sal die “aanbod aandele” slegs aan “gepaste” beleggers beskikbaar gemaak word.
Dit sluit in geselekteerde institutionele beleggers aan wie die aanbod spesifiek gekommunikeer word, genooide beleggers in Suid-Afrika wat inteken as prinsipale vir “aanbod aandele” vir nie minder as R100 000 nie, direkteure en beamptes van die maatskappy en bestaande gewone aandeelhouers (wat boere insluit) van Clover.
Die R500 miljoen?
Volgens Vorster sal sowat R350 miljoen van dié bedrag aangewend word vir hulle primêre kapitale projek, Projek Cielo Blu. Sowat R130 miljoen sal gebruik word om skuld te delg, terwyl die oorlywende bedrag van die noteringskostes sal dra, asook om nuwe sakegeleenthede uit te brei.
Projek Cielo Blu fokus daarop om haakplekke in die maatskappy se produksie en voorsieningskettings aan te spreek. Deur middel daarvan sal die Clayville Langleweprodukte se geriewe van Pretoria na Pinetown en Port Elizabeth verskuif word.
Vorster sê dit sal sakebestuur meer kostedoeltreffend maak. Hy sê dit sal min tot geen werksverliese tot gevolg hê nie. “Daar sal wel een of twee gevalle wees waar ‘n persoon nie sal kan verhuis nie, wat tot ‘n bedanking, ens. kan lei.” Die maatskappy het wel in die middel van die jaar sowat 500 senior werknemers afgelê in ‘n poging tot kostedoeltreffendheid.
Voordeel vir produsente
Vorster sê een van die voordele wat die stap vir produsente inhou, is ‘n aansienlike verhoging in aandelewaarde. “Dit sal Clover ook help om te groei as ‘n maatskappy, wat sal kan lei tot ontwikkeling op plase”.
Volgens Vorster kon die maatskappy die afgelope paar jare baie beperk groei, wat indirek beteken het dat hulle produsente se groei ook beperk was.
“In 2000 het ons sowat 3000 produsente gehad wat aan ons gelewer het. Vandag het ons 280, maar hulle is baie meer gespesialiseerd en hulle operasies het groter geword. Hulle het dus kanse nodig om te groei, en ‘n sterker Clover sal hulle dié kanse bied,” vertel Vorster.
29 November 2010
