Clover Industries Limited het groot waardering teenoor sy produsente uitgespreek terwyl die maatskappy vandag (14 Desember) op die Johannesburgse Effektebeurs (JSE) genoteer het.
Mnr. Johann Vorster, uitvoerende hoof, sê die eerste gesprekke oor dié stap het reeds in 1998 plaasgevind. “Sewe jaar gelede het die JSE gesê ons kon toe nog nie genoteer word nie.”
Met notering in gedagte het die maatskappy sy strategie van aanbodgedrewe na vraaggedrewe begin verander, en in 2008 het hy besef hy het te veel melk en het hy kwotas ingestel. Vorster sê die wêreldwye ekonomiese afswaai het die maatskappy ook gedwing om sy interne strukture meer vaartbelyn te maak wat na afleggings en herstrukturering gelei het.
“Baie dankie aan die boere wat ons toegelaat het om met dié stap voort te gaan en vir die ondersteuning wat ons van adviseurs en verbruikers ontvang het,” aldus Vorster. Hy sê om op die JSE genoteer te wees gaan groot geleenthede vir groei aan die maatskappy en sy produsente verskaf.
“Ons produsente kry die volle voordeel hieraan verbonde.”
Klik hier vir 'n fotogalery van die notering.
Die begin
Clover het sy toekoms op die JSE met ‘n eerste verhandeling van R10,76 per aandeel geopen, wat aan die maatskappy met kapitaal van meer as R1,5 miljard voorsien.
Die maatskappy se gewone en voorkeur-aandele is onder die afdelings voedselprodusente en voorkeuraandele op die hoofbord van die JSE, onder die kodes CLR en CLRP onderskeidelik, gelys.
Die notering het in samewerking met ‘n aanbod van aanbodaandele deur private plasing plaasgevind. Dié 54 761 905 aandele is teen R10,50 per aandeel geplaas, wat ’n inkomste van R575 miljoen tot gevolg gehad het. Dié aandele is aangebied aan uitgesoekte plaaslike en internasionale beleggers. Rand Merchant Bank hanteer die boek vir dié aandele.
Die JSE
Mnr. Russell Loubser, uitvoerende hoof van die JSE, sê: “Die JSE is baie in sy skik om Clover op die hoofbord te verwelkom. Dit is ‘n handelsmerk met wye aanhang in Suid-Afrika. Clover se notering bied beleggers nog ‘n opsie om blootstelling tot die voedselproduksiesektor te kry.”
Die maatskappy is in 1898 gestig. Vorster sê tans neem hy jaarliks sowat R650 miljoen liter melk in, wat sowat 27% van die land se totale melkinhame is.
14 Desember 2010
