Mnr. Wouter Heyns van die plaas Uplands by Cradock is vanjaar se wenner in die suidelike streek in die 20 ton-klub-mieliekompetisie van Cradock Saadverspreiders.
Sy opbrengs van 23,05 t/ha is net effens minder as die nasionale rekord van 23,92 t/ha wat verlede jaar deur mnr. Erich Cloete van die plaas Sanctuary in dieselfde distrik opgestel is.
Die naaswenner is mnr. Zirk Scheepers van die plaas Wonderkop, Cradock, wat 22,98 t/ha geoes het. Scheepers was drie jaar gelede die algehele wenner met ’n opbrengs van 22,5 t/ha.
Boerderypraktyke verbeter
Mnr. Dirk Visser, eienaar van Cradock Saadverspreiders, het by die oorhandiging van die pryse op 24 Junie gesê sedert die kompetisie vier jaar gelede ingestel is, het dit ’n groot bydrae gelewer om beter opbrengste te behaal.
“Boere wat daaraan deelneem, het hul grond- en boerderypraktyke aangepas om ’n volhoubare boerdery van hoë opbrengste met die minimum insette te verkry.” In die noordelike streek was mnr. Hendrik Bloem van die Kroon-boerdery by Colesberg die wenner met ’n opbrengs van 20,34 t/ha. Die naaswenner was mnr. Izak van der Merwe van die plaas Bo-Kransfontein, ook by Colesberg, wat 19,65 t/ha geoes het.
Die twee streekwenners het elk R40 000 gewen en die naaswenners R20 000. Visser sê die prestasie is in ’n moeilike produksiejaar behaal, aangesien die hitte-eenhede hoog was en dit baie droog was, met reën wat eers laat in Januarie en Februarie uitgesak het. Die kompetisie word aanstaande jaar vir die laaste keer aangebied.
Van links na regs: Mnre. Johan Le Roux; Dirk Visser; Elandre Marais; Zirk Scheepers; en Hendrik Bloem. Afwesig is mnr. Wouter Heyns. Foto: Verskaf
