In die lig van die stygende voedselinflasie wat stapelvoedsel toenemend onbekostigbaar vir ’n groot deel van die Suid-Afrikaanse bevolking maak, het die DA sy pleidooi herhaal dat die regering planne gereed moet kry om voedselproduksie te beskerm.
Mnr. Noko Masipa, die DA se skaduminister vir landbou, grondhervorming en landelike ontwikkeling, sê dit sal ook help om kommersiële en kleiner boere teen stygende produksiekoste te beskerm. Hy sê die styging in die prys van stapelvoedsel is hoofsaaklik as gevolg van beurtkrag en Rusland se inval in Oekraïne wat die pryse van onder meer kunsmis die hoogte laat inskiet het.
“Die regering het geen beheer oor die oorlog tussen Rusland en Oekraïne nie, maar hy het wel beheer oor Eskom se beurtkragskedule. Dit lyk egter nie of die ANC-regering ’n plan het om te keer dat die landbou nadelig geraak word nie. Ondanks die pleidooie om die nadelige effek van beurtkrag op die landbou te verminder, is daar steeds geen plan deur die departement van landbou, grondhervorming en landelike regering, min. Thoko Didiza of Eskom se bestuur nie.”
Masipa sê dit gaan lei tot wanvoeding en hongersnood omdat voedsel nie bekostigbaar geproduseer kan word nie en mense ook weens toenemende werkloosheid dit nie kan bekostig om kos te koop nie. “Dit plaas ’n nuwe krisis voor die regering se deur wat opgelos moet word en gaan dit nog moeiliker maak vir die departement om sy meesterplan vir landbou- en landbouverwerking toe te pas.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
