Mnr. Ronald Lamola, adjunkleier van die ANC-jeugliga, het vandeesweek gewaarsku as wittes nie hul grond vrywillig aan swart mense oorhandig nie, kan grondvergrype soos in Zimbabwe in Suid-Afrika voorkom.
Mnr. Athol Trollip, die DA se skaduminister vir landelike ontwikkeling en grondhervorming, het gesê geskiedkundige bewyse dui daarop dat die afvat van grond deur die Naturellen Grondwet van 1913 tot langdurige ekonomiese verval en ontbering, veral in die voormalige tuislandgebiede, gelei het.
Onteiening werk nie
Geen ekonomie waar onteiening sonder vergoeding toegepas is, was nog op lang termyn suksesvol nie. “Die enigste begunstigdes is die skelm politieke elite.”
Suid-Afrika is nie immuun teen die wêreldwye ekonomiese afswaai nie. Oproepe om onteiening ondermyn die Regering se pogings om beleggings te trek. Sonder beleggings sal die beoogde ekonomiese groeikoers van 8% nie bereik word om die nodige werk te skep nie.
Trollip het gesê enige aanval op grondregte sal voedselsekerheid en werkskepping in gedrang bring.
Die beginsel van gewillige verkoper en vrywilliger koper kan nie die skuld kry vir die skokkende slakkepas waarteen grondhervorming plaasvind nie, het hy gesê.
'Roekeloos'
Dr. Pieter Mulder, Adjunkminister van Landbou, Bosbou en Visserye, het in die Nasionale Raad van Provinsies die ANC-jeugliga se uitlatings as uiters skokkend en roekeloos beskryf.
Die jeugliga het onder meer gesê as boere wil leef, moet hulle hul grond verlaat. “Dit is uiters skokkend en ondermyn pogings om voedselsekerheid te bewerkstellig.”
Mulder het gesê daar heers 'n goeie gesindheid by die belanghebbendes, insluitend die georganiseerde landbou, maar hierdie tipe uitsprake vertroebel goeie verhoudinge. “Ons het samewerking nodig en nie hierdie tipe onaanvaarbare propaganda nie,” het hy gesê.
