’n Saak van strafbare manslag word ondersoek nadat ’n 63-jarige boer van Delareyville op sy plaas gesterf het. Die boer en sy 30-jarige seun was Woensdagoggend (18 Julie 2012) in ’n skuur op die plaas Driekant besig om ’n ploeg aan ’n trekker te probeer haak.
Die seun het glo gesien dat die boer gesukkel het om die ploeg aan die trekker gehaak te kry. Hy het na bewering, terwyl die trekker steeds in tru-rat en aangeskakel was, van die trekker afgeklim om sy pa te help. Luidens ’n verklaring het die trekker agteruit geloop en die boer is tussen die trekker en die ploeg vasgedruk.
Op die toneel dood
Die polisie sê die seun het glo onmiddellik weer op die trekker gespring om dit weg te trek. Dit was egter te laat. Die boer het op die plek inmekaar gesak en gesterf.
’n Nadoodse ondersoek sal verrig word om die oorsaak van die boer se dood te bepaal. Niemand is in verband met die voorval in hegtenis geneem nie. Die verklarings oor die voorval sal aan die Direkteur vir Openbare Vervolging voorgelê word.
