Boere van die distrikte Knysna, Plettenbergbaai en Karatara is desperaat vir hulp uit die groter landbougemeenskap ná die onlangse verwoestende brande wat verskeie plase in puin gelê het.
Volgens mnr. Cobus Erasmus van die Knysna-boerevereniging is verskeie plase rondom Knysna tot op die grond afgebrand, met alle voer, plaashuise en buitegeboue, heinings en ander infrastruktuur wat in die slag gebly het.
Volgens Erasmus het verskeie plase van meer as 600ha, sowel as kleiner plase, totaal afgebrand, met honderde diere wat nou sonder enige voer gelaat is. Meeste boere in die omgewing het diere na kampe geskuif sodat hulle gevoer kan word te midde van die knellende droogte.
“Dit is vir ons ’n dubbele ramp – die droogte en toe die brande, wat die bietjie wat nog oor was, kom verwoes het. Dit maak dit nog meer pynlik en intussen is daar geen vooruitsigte op reën vir ons nie. Omdat dit nou winter is, gaan enige aanplantings wat ons nou doen eers in die lente ’n impak hê.”
Volgens Erasmus word dit geskat dat Knysna sowat 28 dae se water oor het maar dat dit volgens hom waarskynlik nie eers soveel is nie.
Infrastruktuur
Die afbrand van heinings het ook verdere komplikasies veroorsaak.
“Meeste van die plase grens aan paaie. Die distriksmunisipaliteit het onderneem om die heinings te herstel sodra hulle geld kry. Oor die korttermyn moet ons egter ’n plan maak om heinings te herstel om die diere van die paaie af te hou.
“Ons het hulle nou in kampies ingedruk waar ons hulle kan voer, maar ongelukkig is van die kampe waar water is, teen die pad. Nou moet ons water tydelik oor in tenke uitpomp net om water by die diere te kry.”
Erasmus sê die grootste nood is voer vir die diere. “Hier is heelwat skape, beeste en perde wat ernstig voer nodig het.”
Intussen is mense in die streek dankbaar vir die hulp wat van oral instroom. “Al die kerke, skole – oral is stasies opgesit vir water, kos en klere. Talle mense wat vakansiehuise hier het, het dit oopgestel het vir mense wat behuising nodig het. Meer as 400 huise het afgebrand en baie mense wat hier woon en werk het niks oor nie.”
Lesers wat boere van die omgewing met voer wil help kan Erasmus by 082 855 2553 of Pieter Reed by 083 267 4331 kontak.
